உலக நாடுகள் பல, திடீரென்று அதி தீவிரமாக பல தசாப்தங்களில் இல்லாத அளவுக்கு தங்கத்தை வாங்கி வருவதாக தகவல் வெளியாகியுள்ளது.
ஏறக்குறைய இரு மடங்கு
அதிகரித்து வரும் புவிசார் அரசியல் பதட்டங்கள், தொடர்ச்சியான பணவீக்கக் கவலைகள், நாணய அபாயங்கள் மற்றும் அமெரிக்க டொலர் போன்ற பாரம்பரிய சொத்துக்களிலிருந்து விலகி கையிருப்புகளைப் பல்வகைப்படுத்த வேண்டும் என்ற அதிகரித்து வரும் உந்துதல் ஆகியவையே முதன்மையான காரணமாகக் கூறப்படுகிறது.
உலக தங்க கவுன்சிலின் (WGC) சமீபத்திய மத்திய வங்கிகளின் தங்க இருப்பு குறித்த ஆய்வின் அடிப்படையில், கடந்த நான்கு ஆண்டுகளில் உத்தியோகப்பூர்வ நிறுவனங்கள் ஆண்டுக்கு சராசரியாக 1,000 டன் தங்கத்தை வாங்கியுள்ளன; இது முந்தைய பத்தாண்டுகளில் பதிவு செய்யப்பட்ட சராசரி ஆண்டு கொள்முதல் அளவை விட ஏறக்குறைய இரு மடங்காகும்.
இந்தக் கொள்முதல் வேகம் குறைவதற்கான அறிகுறிகள் தென்படவில்லை. மத்திய வங்கிகளில் 89 சதவீதம், அடுத்த ஆண்டில் உலகளாவிய அதிகாரப்பூர்வ தங்கக் கையிருப்பு அதிகரிக்கும் என எதிர்பார்க்கின்றன.
அதே நேரத்தில், 45 சதவீத வங்கிகள் தங்களின் சொந்த கையிருப்பை மேலும் அதிகரிக்கும் என எதிர்பார்க்கின்றன, இது ஒரு சாதனை அளவாகும்.
புவிசார் அரசியல் மோதல்கள், வர்த்தகப் பதற்றங்கள் மற்றும் அதிகரித்த நிதிச் சந்தை நிலையற்ற தன்மை ஆகியவற்றால் உலகப் பொருளாதாரம் தத்தளித்துக் கொண்டிருக்கும் ஒரு காலகட்டத்தில், ஒரு உத்திசார் இருப்புச் சொத்தாகத் தங்கத்தின் அதிகரித்து வரும் பங்கை இந்த ஆய்வுகள் அடிக்கோடிட்டுக் காட்டுகின்றன.
மத்திய வங்கிகள் பொதுவாகத் தங்கள் சொந்த நாணயங்களுக்கு ஆதரவளிக்கவும் நிதி நிலைத்தன்மையைப் பேணவும், அமெரிக்க கருவூலப் பத்திரங்கள், அரசாங்கப் பத்திரங்கள் மற்றும் வெளிநாட்டு நாணயங்கள் போன்ற சொத்துக்களை உள்ளடக்கிய அந்நியச் செலாவணிக் கையிருப்புகளைப் பராமரிக்கின்றன.
இருப்பினும், தங்கம் ஒரு தனித்துவமான இடத்தைப் பெற்றுள்ளது, ஏனெனில் அது கடன் அல்லது எதிர் தரப்பு இடர்பாடுகள் இல்லாத ஒரு பௌதீகச் சொத்தாகும், மேலும் ஒரு அரசாணையால் நாணயங்களை உருவாக்குவது போல தங்கத்தை விருப்பப்படி உருவாக்கவும் முடியாது.
பணவீக்கம் அல்லது பண விநியோகத்தை அதிகரிக்கும் கொள்கைகளால் மதிப்பு குறையக்கூடிய காகித நாணயங்களைப் போலன்றி, தங்கத்தின் இருப்பு இயற்கையாகவே வரையறுக்கப்பட்டதாக உள்ளது.
கையிருப்பை தங்கள் நாட்டிலேயே
மற்றொரு சிறப்பம்சம் என்னவென்றால், அமெரிக்க டாலரின் போக்கிலிருந்து சுயாதீனமாகவோ அல்லது அதற்கு நேர்மாறாகவோ கூட நகரும் தங்கத்தின் வரலாற்றுரீதியான போக்கு ஆகும்.
உலகளாவிய அந்நியச் செலாவணிக் கையிருப்பில் டொலர் இன்னும் மிகப்பெரிய பங்கைக் கொண்டிருப்பதால், தங்கத்தை வைத்திருப்பது, குவிப்பு அபாயத்தைக் குறைக்கவும், டொலரின் பலவீனம் அல்லது அதிகரித்த சந்தை நெருக்கடி காலங்களில் கையிருப்புத் தொகுப்புகளைப் பாதுகாக்கவும் உதவுகிறது.
இதுவரையில் பெரும்பாலான மத்திய வங்கிகள் தங்களுடைய தங்கக் கையிருப்பை பேங்க் ஆப் இங்கிலாந்திலும் நியூயார்க் ஃபெடரல் ரிசர்வ் போன்ற வங்கியிலும் சேமித்து வந்தன ஆனால் தற்போது சில மத்திய வங்கிகள் தங்களுடைய தங்கக் கையிருப்பை தங்கள் நாட்டிற்க்கே கொண்டுவரத் தொடங்கியுள்ளன.
பிற நாடுகளில் ஏற்பட்டுள்ள அரசியல் மாற்றங்களாலும், போர் பதற்றத்தின் காரணமாகவும் தங்களுடைய கையிருப்பை தங்கள் நாட்டிலேயே வைத்துக் கொள்ள முடிவெடுத்துள்ளன.
தற்போது ஏற்பட்டிருக்கும் பிரச்சனையை மட்டும் வைத்து உலக நாடுகள் இந்த முடிவை எடுக்கவில்லை. தங்கத்தின் விலை உச்சத்தில் இருந்த போதும் தொடர்ந்து மத்திய வங்கிகள் தங்கத்தை வாங்கி குவித்தன. இதே நிலை தொடர்ந்தால் டொலரின் பங்கு குறைந்து, தங்கத்தின் பங்கு அதிகரிக்கும் என்றே எதிர்பார்க்கப்படுகிறது.
