கண்டி நகரை மையமாகக் கொண்ட நான்கு மாபெரும் உள்கட்டமைப்பு அபிவிருத்தித் திட்டங்களை அடுத்த 2 வருடங்களுக்குள் முழுமையாக நிறைவு செய்ய போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சு திட்டமிட்டுள்ளது.
உத்தியோகபூர்வ அபிவிருத்தித் திட்டத்தின் கீழ் முன்னெடுக்கப்படும் இத்திட்டங்களின் தற்போதைய கட்டுமானப் பணிகளை, விவசாய, கால்நடை, காணி மற்றும் நீர்ப்பாசன அமைச்சர் கே. டி. லால்காந்த மற்றும் போக்குவரத்து, நெடுஞ்சாலைகள் பிரதி அமைச்சர் கலாநிதி பிரசன்ன குணசேன ஆகியோர் நேற்று (15) நேரில் சென்று பார்வையிட்டு, அதன் முன்னேற்றங்கள் குறித்துக் கேட்டறிந்தனர்.
கள ஆய்வுக்கு உட்படுத்தப்பட்ட திட்டங்களின் விரிவான விபரங்கள், நிதி ஒதுக்கீடுகள் மற்றும் தொழில்நுட்ப அம்சங்கள் பின்வருமாறு:
கத்தம்பே சந்தி மேம்பாலம்:
பேராதனை – கண்டி உள்ளிட்ட பிரதான வீதிகளில் நிலவும் கடுமையான போக்குவரத்து நெரிசலுக்குத் தீர்வாக இத்திட்டம் வடிவமைக்கப்பட்டுள்ளது.
அரசியல், நிர்வாகம் மற்றும் நிதிப் பற்றாக்குறை உள்ளிட்ட பல்வேறு காரணங்களால் 2025 பெப்ரவரியில் இத்திட்டத்தின் பணிகள் தற்காலிகமாக நிறுத்தப்பட்டிருந்தன. தற்போது தடைகள் நீக்கப்பட்டு பணிகள் மிக வேகமாக நடைபெற்று வருகின்றன.
திட்ட மதிப்பு: 14 பில்லியன் ரூபாய் (Rs. 14 Billion).
வில்லியம் கோபல்லாவ வீதி:
கண்டி நகரின் அன்றாட போக்குவரத்து நெரிசலைக் குறைக்கும் நோக்கில், இவ்வீதி நான்கு வழிச்சாலையாக (4 Lanes) விரிவுபடுத்தப்பட்டு அபிவிருத்தி செய்யப்படுகிறது.
ஒதுக்கப்பட்ட நிதி: ரூ. 675 மில்லியன்
லூயிஸ் பீரிஸ் வீதி:
கண்டி – புவெலிகட – அம்பிட்டிய ஆகிய நகரங்களை இணைக்கும் வகையில் இவ்வீதி இரு வழிச்சாலையாகவும், இருபுறமும் பாதசாரிகளுக்கான நடைபாதைகளுடனும் மேம்படுத்தப்படுகிறது.
மலைப்பாங்கான மற்றும் இயற்கை எழில் கொஞ்சும் சரிவுப் பகுதியில் அமைந்துள்ள இவ்வீதியில், நிலச்சரிவுகளைத் தடுத்து மலையை வலுப்படுத்துவதற்காக அதிநவீன ‘மண் ஆணி அடித்தல்’ (Soil Nailing) பாதுகாப்புத் தொழில்நுட்ப முறை பயன்படுத்தப்படுகிறது.
ஒதுக்கப்பட்ட நிதி: ரூ. 539 மில்லியன்
மஹய்யாவ சுரங்கப்பாதை:
கண்டி – யாழ்ப்பாணம் (A-009) பிரதான வீதி மற்றும் மலைநாட்டு ரயில் பாதைக்குக் கீழே போக்குவரத்து வசதிகளை எளிதாக்கும் வகையில் இந்த சுரங்கப்பாதை அமைக்கப்படுகிறது.
பரிமாணங்கள்: 31.7 மீட்டர் நீளம், 21.8 மீட்டர் அகலம் மற்றும் 9 மீட்டர் உயரம் கொண்டது.
திட்ட மதிப்பு: ரூ. 650 மில்லியன்
