நாவற்காடு ‘அக்னிச் சிறகுகள் பேரவை’யின் மற்றுமொரு சமூக நற்செயற்பாடாக, மட்/ மமே/ நாவற்காடு நாமகள் கனிஷ்ட வித்தியாலயத்தில் 2026-ஆம் ஆண்டு நடைபெற்ற தரம் 5 புலமைப்பரிசில் பரீட்சையில் சாதனை படைத்த மாணவர்களையும் கற்பித்த ஆசிரியர்களையும் கௌரவிக்கும் சிறப்பு நிகழ்வு கடந்த 16/10/2026 அன்று மிகச் சிறப்பாக நடைபெற்று முடிந்தது.
இக்கௌரவிப்பு நிகழ்வு நாவற்காடு நாமகள் கனிஷ்ட வித்தியாலய அதிபர் திருமதி சிவாஜினி ஜெயராஜ் அவர்களின் தலைமையில், அக்னிச் சிறகுகள் பேரவையின் ஏற்பாட்டில் நடைபெற்றது.
நிகழ்வின் சிறப்பம்சங்கள்:
வெட்டுப்புள்ளிக்கு மேல் பெற்ற மாணவர்கள்: 2026 தரம் 5 புலமைப்பரிசில் பரீட்சையில் வெட்டுப்புள்ளிகளுக்கு மேல் புள்ளிகளைப் பெற்று பாடசாலைக்கு பெருமை சேர்த்த 5 மாணவர்கள் இதன்போது சிறப்புப் பரிசுகள் வழங்கி கௌரவிக்கப்பட்டனர்.
மாணவர்களுக்குப் பாராட்டு & கொப்பிகள் வழங்கல்: இம்முறை பரீட்சையில் தோற்றி 70 புள்ளிகளுக்கு மேல் மற்றும் 100 புள்ளிகளுக்கு மேல் பெற்றுத் திறமையை வெளிப்படுத்திய 39 மாணவர்களுக்குக் கற்றல் உபகரணங்களாகக் கொப்பிகள் வழங்கி வாழ்த்தப்பட்டனர்.
ஆசிரியர்களுக்குக் கௌரவம்: மாணவர்களின் இச்சாதனைக்கு உறுதுணையாக நின்று வழிகாட்டிய கற்பித்த ஆசிரியர்களும் இந்நிகழ்வில் பாராட்டி கௌரவிக்கப்பட்டனர்.
கலந்துகொண்ட விருந்தினர்கள்:
இந்நிகழ்வில் பிரதம அதிதியாக மண்முனை மேற்கு கோட்டக்கல்விப்பணிப்பாளர் திரு. S. தீபதர்ஷன் அவர்கள் கலந்து கொண்டு மாணவர்களைக் கௌரவித்து வாழ்த்துரையாற்றினார்.
மேலும், ஓய்வுநிலை சேவைக்கால ஆலோசகர் திரு. ரவிச்சந்திரன், அக்னிச் சிறகுகள் பேரவையின் தாயகப் பொறுப்பாளரும் இணைப்பாளருமான திரு. சோ. சிவாகரன், சமூகச் செயற்பாட்டாளர் திரு. வெ. சிவலோகநாதன் ஆகியோர் சிறப்பு விருந்தினர்களாகக் கலந்துகொண்டு, ஆசிரியர்களுடனும் ஏனைய கற்பித்தல் சமூகத்துடனும் இணைந்து மாணவர்களுக்குப் பரிசுகளையும் பாராட்டுக்களையும் வழங்கிச் சிறப்பித்தனர்.
பாடசாலையின் கல்வி வளர்ச்சிக்கும் மாணவர்களின் ஊக்கத்திற்கும் தொடர்ந்து கரங்கொடுத்து வரும் அக்னிச் சிறகுகள் பேரவையின் இச்செயற்பாட்டிற்குப் பெற்றோர்களும் கிராம மக்களும் தங்களது மனமார்ந்த நன்றிகளையும் பாராட்டுக்களையும் தெரிவித்துக் கொண்டனர்.
More Read
