அமெரிக்கா-இஸ்ரேல் மற்றும் ஈரான் இடையிலான மோதலுக்கு மத்தியில், ஐக்கிய அரபு அமீரகம் (UAE) நூற்றுக்கணக்கான மீட்பு விமானங்களை இயக்க திட்டமிட்டுள்ளது.
மத்திய கிழக்கில் ஏவுகணை மற்றும் ட்ரோன் தாக்குதல்களால் வளைகுடா வான்வெளி மூடப்பட்ட நிலையில், ஆயிரக்கணக்கான விமானங்கள் ரத்து செய்யப்பட்டன.
இதனால் பல ஆயிரக்கணக்கான பயணிகள் தங்கள் நாடுகளுக்கு திரும்பமுடியாமல் சிக்கியுள்ளனர்.
இந்த சூழ்நிலையில், ஐக்கிய அரபு அமீரக அரசு, அடுத்த சில வாரங்களில் நூற்றுக்கணக்கான மீட்பு விமானங்களை இயக்கத் திட்டமிட்டுள்ளது.
தேசிய அவசரநிலை மற்றும் பேரிடர் மேலாண்மை ஆணையத்தின் அதிகாரி, சயீஃப் அல் தஹேரி, “விரைவில் 300 விமானங்கள் புறப்படும்” என்றும், விமான நிறுவனங்களுடன் இணைந்து கட்டுப்படுத்தப்பட்ட முறையில் நடவடிக்கை எடுக்கப்படுவதாகவும் கூறியுள்ளார்.
ஏற்கனவே 60 விமானங்கள் புறப்பட்டு, 17,498 பயணிகள் தங்கள் நாடுகளுக்கு திரும்பியுள்ளனர். அடுத்த கட்டத்தில் தினமும் 80-க்கும் மேற்பட்ட விமானங்கள் இயக்கப்பட்டு, 27,000 பயணிகள் பயணிக்கவுள்ளனர்.
அமீரகம், அண்டை GCC நாடுகள் மற்றும் சர்வதேச சிவில் விமானப் போக்குவரத்து அமைப்புடன் இணைந்து அவசர வான்வழிகளை உருவாக்கியுள்ளது.
பயணிகள், தங்கள் விமான நிறுவனம் உறுதிப்படுத்திய தகவலின்றி விமான நிலையங்களுக்கு செல்ல வேண்டாம் என எச்சரிக்கை விடுக்கப்பட்டுள்ளது.
இந்திய பயணிகளுக்காக, IndiGo, Air India, Air India Express ஆகிய நிறுவனங்கள் 58 மீட்பு விமானங்களை இயக்கவுள்ளதாக இந்திய விமானப் போக்குவரத்து அமைச்சகம் அறிவித்துள்ளது.
இது, Covid-19 பெருந்தொற்றுக்குப் பிறகு மிகப்பெரிய விமானப் போக்குவரத்து தடையாக கருதப்படுகிறது.
அமீரக அரசு, சிக்கியுள்ள பயணிகளுக்கு தங்குமிடம், உணவு, விசா வசதிகள் அனைத்தையும் வழங்குவதாக உறுதியளித்துள்ளது.
