எதிர்காலத்தில் சீரான லாபத்தை ஈட்டக்கூடிய மூன்று நிதி நிறுவனப் பங்குகளை அடையாளம் கண்டுள்ளது ஜெஃப்ரீஸ் நிறுவனம்.
ஜெஃப்ரீஸ் தெரிவு
இந்த நிறுவனம் தெரிவு செய்துள்ள இந்த பங்குகளில் தற்போதுள்ள மதிப்பில் இருந்து 38 சதவீதம் வரையில் உயர்வு காண வாய்ப்புள்ளது எனவும் ஜெஃப்ரீஸ் தெரிவித்துள்ளது.
நிதித்துறையில் ஜெஃப்ரீஸ் தெரிவு செய்துள்ள முதன்மையான பங்குகளில் சோழமண்டலம் இன்வெஸ்ட்மென்ட் அண்ட் ஃபைனான்ஸ் கம்பெனி, ஸ்ரீராம் ஃபைனான்ஸ் மற்றும் பஜாஜ் ஃபைனான்ஸ் ஆகியவை அடங்கும்.
இந்த மூன்று பங்குகளையும் வாங்கலாம் என ஜெஃப்ரீஸ் பரிந்துரைத்துள்ளது. சோழமண்டலம் நிறுவனத்துக்கு ரூ2,040 (18% உயர்வு), ஸ்ரீராம் ஃபைனான்ஸுக்கு ரூ1,220 (13% உயர்வு), பஜாஜ் ஃபைனான்ஸுக்கு ரூ1,270 (25% உயர்வு) என இலக்கு விலைகள் நிர்ணயிக்கப்பட்டுள்ளன.
இந்த பங்குகளில் முதலீடு செய்ய ஜெஃப்ரீஸ் உறுதியான நிலைப்பாட்டை எடுக்க, நிதித்துறையில் லாப வளர்ச்சி மேம்பட்டு வருவது ஒரு முக்கிய காரணி என கூறப்படுகிறது.
ஜெஃப்ரீஸ் வெளியிட்டுள்ள அறிக்கையின் அடிப்படையில், Q3FY26 காலாண்டில், (பிரமல் ஃபைனான்ஸ் மற்றும் ஐஐஎஃப்எல் தவிர) தங்கள் கண்காணிப்பில் உள்ள NBFC (வங்கிசாரா நிதி நிறுவனங்கள்) மற்றும் HFC (வீட்டு நிதி நிறுவனங்கள்) லாப வளர்ச்சி ஆண்டுக்கு 28 சதவீதமாக (முந்தைய காலாண்டில் 20%) அதிகரித்துள்ளது.
சீரான கடன் அதிகரிப்பு, மேம்பட்ட நிகர வட்டி வரம்பு (NIMs) மற்றும் குறைந்த கடன் செலவுகள் ஆகியவையே இதற்கு காரணம். சோழமண்டலம், ஸ்ரீராம் ஃபைனான்ஸ், பஜாஜ் ஃபைனான்ஸ் மற்றும் பிற தெரிவு செய்யப்பட்ட வீட்டு நிதி நிறுவனங்கள் 20 முதல் 30 சதவீதம் லாப வளர்ச்சியைப் பதிவு செய்துள்ளன.
அடுத்த நிதியாண்டிலும்
பஜாஜ் ஃபைனான்ஸ் நிறுவனத்தின் வட்டிக்குப் பிந்தைய லாபம் (PAT) 6 சதவீதம் சரிந்திருந்தாலும், இது ஒருமுறை செய்யப்பட்ட கூடுதல் ஒதுக்கீட்டுக் கணக்கின் (one-time overlay provision) காரணமாகவே ஏற்பட்டது என ஜெஃப்ரீஸ் தெளிவுபடுத்தியுள்ளது.
இந்த ஒதுக்கீட்டைத் தவிர்த்துப் பார்த்தால், அதன் லாபம் ஆண்டுக்கு 23 சதவீதம் வளர்ந்துள்ளது. இந்தத் துறையின் அடிப்படை வருவாய் வளர்ச்சி ஆரோக்கியமாக உள்ளதுடன், அடுத்த நிதியாண்டிலும் தொடரும் என ஜெஃப்ரீஸ் நம்புகிறது.
பஜாஜ் ஃபைனான்ஸை பொறுத்தவரை, இறுக்கமான கடன் கொள்கைகள் சில பிரிவுகளில் வளர்ச்சி மந்தநிலைக்கு வழிவகுத்தாலும், Q1-Q2FY27 இல் அழுத்தம் குறையும் பட்சத்தில் மீண்டும் வளர்ச்சியை மேம்படுத்தும் என்று ஜெஃப்ரீஸ் எதிர்பார்க்கிறது.
சுருக்கமாக, அதிகரித்துவரும் லாப வளர்ச்சி, நிலைபெறும் கடன் போக்குகள் மற்றும் மேம்பட்ட லாப வரம்புகள் ஆகியவை சோழமண்டலம், ஸ்ரீராம் ஃபைனான்ஸ் மற்றும் பஜாஜ் ஃபைனான்ஸ் மீதான ஜெஃப்ரீஸின் நேர்மறையான நிலைப்பாட்டிற்கான முக்கிய காரணிகளாக அமைந்துள்ளது.
