வனவிலங்குகளையும் கூண்டுகளுக்குள் அடைத்து இரசிக்கும் மனிதர்களுக்கு மத்தியில், எந்தவிதமான தடையோ, கூண்டோ இல்லாமல், இயற்கையான சூழலில் ஒரு காட்டுயிரோடு இவ்வளவு நெருக்கமாகப் பழக முடியும் என்பதை அந்தச் சிறுமி உலகிற்கு நிரூபித்துக் காட்டியுள்ளார்.
சமூக வலைத்தளங்களில் கடந்த சில நாட்களாக பலரது இதயங்களை உருக வைத்த ஒரு வீடியோ வைரலாகி வருகிறது. ஒரு சிறிய கிராமத்துச் சிறுமி, வயல் வரப்பில் நடந்து செல்லும்போது அவளுக்குப் பின்னால் ஒரு பூனையும், அதைத் தொடர்ந்து ஒரு காட்டு முள்ளம்பன்றியும் எவ்வித பயமுமின்றி பின்தொடர்ந்து செல்லும் காட்சியைக் கொண்ட வீடியோதான் வைரலானது. அந்த அழகிய காட்சி பார்ப்போரைக் சிலிர்க்க வைக்கிறது.
முதலில் இந்த வீடியோ வங்கதேசத்தில் எடுக்கப்பட்டது என்று சமூக வலைத்தளங்களில் தவறான தகவல்களுடன் பரப்பப்பட்டது. ஆனால், பின்னர் பெறப்பட்ட தகவல்களின் அடிப்படையில் இந்த நெகிழ்ச்சியான சம்பவம் இலங்கையின் வரலாற்றுச் சிறப்புமிக்க பொலன்னறுவை பகுதியில்தான் நிகழ்ந்துள்ளது என்பது தற்போது உத்தியோகபூர்வமாக உறுதிப்படுத்தப்பட்டுள்ளது.
பொதுவாக முள்ளம்பன்றி என்பது மனிதர்களைக் கண்டால் விலகி ஓடக்கூடிய, அல்லது தன் உடலின் கூர்மையான முட்களை சிலிர்த்துக்கொண்டு தாக்க முற்படக்கூடிய ஒரு காட்டுயிராகும். அதனை வீட்டில் வளர்ப்பதோ, சாதாரணமாகப் பழகுவதோ அத்தனை எளிதான காரியம் அல்ல. ஆனால், பொலன்னறுவையைச் சேர்ந்த அந்தச் சிறுமி, எந்தவித அச்சமும் இன்றி, தன் வீட்டுச் செல்லப் பிராணியைப் போல அந்த முள்ளம்பன்றியோடு பழகி வருகிறாள்.
வயல்வெளிகளில் அவள் ஓடி ஆடி விளையாடும்போது, அவளது நிழல் போல அந்த முள்ளம்பன்றியும் அவளது கால்களையே சுற்றிச் சுற்றி வருகிறது. இடையில் மற்றொரு குட்டி உயிரினத்தை அவள் தூக்கிச் செல்வதும், பின்னர் அதை விட்டுவிட்டு முள்ளம்பன்றியுடன் தனது பயணத்தைத் தொடர்வதுமான காட்சிகள் பார்ப்பதற்கு ஏதோ ஒரு ‘டிஸ்னி’ அனிமேஷன் திரைப்படத்தின் நிஜ வடிவத்தைப் போல காட்சியளிக்கிறது.
பொலன்னறுவை பகுதியைச் சேர்ந்த ஒரு நபர், கடந்த ஜூன் 11 ஆம் திகதி இந்த வீடியோவை முதன்முதலில் தனது முகநூல் (Facebook) பக்கத்தில் பதிவேற்றியுள்ளார். அதன் பின்னரே, இந்தச் சிறுமி அந்த உயிரினங்களுக்கு உணவளிப்பது, அவற்றுடன் காடுகளிலும் வயல்களிலும் இயல்பாக உலா வருவது போன்ற தொடர்ச்சியான பல வீடியோக்கள் வெளியாகி இன்னும் பெரிய அளவில் வைரலாகின.
வனவிலங்கு ஆர்வலர்கள் மற்றும் சர்வதேச நெட்டிசன்கள் பலரும் அச்சிறுமியை “நிஜ உலக டிஸ்னி இளவரசி” (Real-life Disney Princess) என்று வர்ணித்து வருகின்றனர். காடுகளையும், வனவிலங்குகளையும் கூண்டுகளுக்குள் அடைத்து இரசிக்கும் மனிதர்களுக்கு மத்தியில், எந்தவிதமான தடையோ, கூண்டோ இல்லாமல், இயற்கையான சூழலில் ஒரு காட்டுயிரோடு இவ்வளவு நெருக்கமாகப் பழக முடியும் என்பதை அந்தச் சிறுமி உலகிற்கு நிரூபித்துக் காட்டியுள்ளார்.
இந்த வீடியோ உலக அளவில் ட்ரெண்ட் ஆனபோது, இது வங்காளதேசத்தில் நடந்ததாக அந்நாட்டுச் சமூக வலைத்தளப் பக்கங்கள் பலவும் உரிமை கொண்டாடின. ஆனால், வங்காளதேசத்தைச் சேர்ந்த உண்மை கண்டறியும் நிறுவனம் ஒன்று நடத்திய ஆய்வில், இந்த வீடியோவில் பின்னணியில் பேசப்படும் குரல்கள் மற்றும் மொழி சிங்கள மொழி என்பது கண்டறியப்பட்டது. அதன் பின்னரே, இது இலங்கையில் எடுக்கப்பட்ட அசல் வீடியோ என்பது சர்வதேச அளவில் உலகிற்குத் தெரியவந்தது.
More Read
இன்றைய நவீன உலகில், மனிதர்கள் இயற்கையையும் விலங்குகளையும் தங்களின் சுயநலத்திற்காக அழித்து வரும் வேளையில், இந்த இலங்கைச் சிறுமியின் தூய்மையான அன்பு ஒட்டுமொத்த மனிதகுலத்திற்கும் ஒரு சிறந்த பாடமாக அமைந்துள்ளது. விலங்குகளிடம் நாம் காட்டும் உண்மையான அன்பும், கருணையும் ஆபத்தான காட்டு விலங்குகளைக் கூட நம்மிடம் சரணடையச் செய்யும் என்பதற்கு இந்த முள்ளம்பன்றியின் நட்பே சாட்சி.
எந்தவித எதிர்பார்ப்பும் இல்லாத இந்த உன்னதமான நட்பு, இலங்கைக்கு சர்வதேச அளவில் ஒரு பெருமையையும், பார்ப்பவர்களின் மனதிற்குப் ஒருவகையான அமைதியையும் தந்துள்ளது என்பதில் மாற்றுக் கருத்து இல்லை.
