நேற்றையதினம் (18) நடைபெற்ற அமைச்சரவைக் கூட்டத்தில் பின்வரும் 20 முக்கிய தீர்மானங்கள் எடுக்கப்பட்டுள்ளன.
1. பெண்களுக்கு எதிரான வன்முறை தொடர்பான உலகளாவிய ஆராய்ச்சியில் யாழ். பல்கலைக்கழகம் இணைவு
– பெண்கள் மற்றும் சிறுவர்களுக்கு எதிரான வன்முறைகளைத் தடுப்பதற்கான சர்வதேச ஒத்துழைப்பு ஒப்பந்தத்திற்கு அனுமதி
பெண்களுக்கு எதிரான வன்முறை தொடர்பான உலகளாவிய ஆராய்ச்சியில் யாழ்ப்பாணப் பல்கலைக்கழகம் இணைவு
பெண்கள் மற்றும் சிறுவர்களுக்கு எதிரான வன்முறைகளைத் தடுப்பதற்கான சர்வதேச ஒத்துழைப்பு ஒப்பந்தத்திற்கு அனுமதி.
பெண்கள் மற்றும் சிறுவர்களுக்கு எதிரான வன்முறைகள் தொடர்பான உலகளாவிய சுகாதார ஆராய்ச்சி வலையமைப்பின் செயற்திட்டத்தில் இணைந்துகொள்ள யாழ்ப்பாணப் பல்கலைக்கழகத்திற்கு அமைச்சரவை அனுமதி வழங்கியுள்ளது. ஐக்கிய இராச்சியத்தின் தேசிய சுகாதார மற்றும் சமூக ஆராய்ச்சி நிறுவனத்தின் 173.92 மில்லியன் ரூபா நிதியுதவியுடன் இத்திட்டம் செயல்படுத்தப்படவுள்ளது. யாழ்ப்பாணப் பல்கலைக்கழகம், பர்மிங்ஹாம் பல்கலைக்கழகம் உட்பட 11 சர்வதேச நிறுவனங்களுடன் இணைந்து 04 ஆண்டுகளுக்கு இத்திட்டத்தை முன்னெடுக்கவுள்ளது. இதன் மூலம் வன்முறைகளால் பாதிக்கப்பட்டோருக்கான ஆதரவு, சுகாதாரப் பிரச்சினைகளை மதிப்பீடு செய்தல் மற்றும் கொள்கை ரீதியான தீர்வுகளைக் கண்டறிதல் போன்ற பணிகள் முன்னெடுக்கப்படும்.
2. இலங்கை காப்புறுதி ஒழுங்குமுறைப்படுத்தல் ஆணைக்குழு AIA குழுமத்தில் உறுப்புரிமை பெறல்
– காப்புறுதித் துறையில் சர்வதேச ஒத்துழைப்பை வலுப்படுத்தவும் தகவல்களைப் பரிமாறிக் கொள்ளவும் நடவடிக்கை
இலங்கையில் பண தூய்தாக்கம் மற்றும் பயங்கரவாதத்திற்கு நிதி வழங்குவதைத் தடுப்பதற்கான சர்வதேச தரங்களை எட்டுவதற்கு, இலங்கை காப்புறுதி ஒழுங்குமுறைப்படுத்தல் ஆணைக்குழு (IRCSL) சர்வதேச அமைப்புகளுடன் இணைந்து செயல்படுவது அவசியமாகும். இதற்கமைய, ஹொங்கொங் காப்புறுதி அதிகார சபையினால் வழிநடத்தப்படும் AIA குழுமத்தின் மேற்பார்வை சபையில் (AIA Group College of Supervisors) உறுப்புரிமை பெறுவதற்குத் தீர்மானிக்கப்பட்டுள்ளது. இதற்கான புரிந்துணர்வு ஒப்பந்தத்தை மேற்கொள்வதன் மூலம் காப்புறுதி ஒழுங்குமுறை தொடர்பான தகவல்களைப் பரிமாறிக்கொள்ளவும், பிராந்திய ரீதியான ஒத்துழைப்பை அதிகரிக்கவும் வழிவகுக்கும்.
3. உலர் வலயத்தில் பால் உற்பத்தியை அதிகரிக்க ரூ. 300 மில்லியன் நிதியில் தொழில்நுட்ப உதவி
– ஜப்பானிய நிறுவனமான JICA வின் உதவியுடன் 4 மாகாணங்களில் பால் உற்பத்தி மேம்படுத்தப்படும்
உலர் வலயங்களில் பால் உற்பத்தியை மேம்படுத்துவதற்காக ஜப்பானிய சர்வதேச ஒத்துழைப்பு முகவர் நிலையத்தின் (JICA) 300 மில்லியன் ரூபா நிதியுதவியுடன் 03 ஆண்டுகால செயற்திட்டத்தை ஆரம்பிக்க அமைச்சரவை அனுமதி வழங்கியுள்ளது. இத்திட்டத்தின் கீழ் வடக்கு, கிழக்கு, வடமத்திய மற்றும் வடமேல் மாகாணங்களில் உள்ள பால் பண்ணையாளர்களுக்குப் பயிற்சி அளிக்கப்பட்டு, தினசரி பால் உற்பத்தியை 20 லீற்றரிலிருந்து 100 லீற்றராக உயர்த்த இலக்கு நிர்ணயிக்கப்பட்டுள்ளது. இதற்காக ஒவ்வொரு மாகாணத்திலிருந்தும் 02 மாவட்டங்கள் வீதம் மொத்தம் 24 மாதிரிப் பண்ணைகள் உருவாக்கப்படும்.
4. சிறிய, நடுத்தர தொழில்முயற்சிகளுக்காக தேசிய ஒழுங்குமுறை மறுசீரமைப்பு சபை
– முதலீடுகளை ஈர்க்கவும் தொழில் செய்யும் சூழலை எளிதாக்கவும் புதிய சீர்திருத்தக் குழு உருவாக்கம்
இலங்கையின் பொருளாதாரத்தை வலுப்படுத்துவதில் சிறு மற்றும் நடுத்தர அளவிலான தொழில்முயற்சிகள் (SMEs) முக்கிய பங்கு வகிக்கின்றன. இருப்பினும், தற்போதுள்ள ஒழுங்குமுறை விதிகள் சிலவற்றால் இத்துறையினர் சவால்களை எதிர்கொள்கின்றனர். இதனை நிவர்த்தி செய்ய, உலக வங்கியின் உதவியுடன் மேற்கொள்ளப்பட்ட ஆய்வுகளின் அடிப்படையில், ஜனாதிபதியின் தலைமையில் ‘தேசிய ஒழுங்குமுறை மறுசீரமைப்பு சபையை’ (National Regulatory Reform Council) நிறுவ அமைச்சரவை அங்கீகாரம் அளித்துள்ளது. இந்தச் சபை குறுகிய மற்றும் நீண்டகாலச் சீர்திருத்தங்களைச் செயல்படுத்துவதுடன், தொழில்முயற்சிகளுக்கான தடைகளை நீக்கப் பாடுபடும்.
5. சமயக் குழுக்களின் இடப்பெயர்வுக் கொள்கையை தயாரிக்க தீர்மானம்
– வெளிநாட்டு சமயப் பணியாளர்களின் வருகை மற்றும் செயற்பாடுகளை முறைப்படுத்த புதிய சட்டக் கட்டமைப்பு
இலங்கைக்குச் சமயத் தேவைகளுக்காகவும் கல்விக்காகவும் வரும் வெளிநாட்டுச் சமயக் குழுக்களின் வருகையை முறைப்படுத்தவும், அவர்களின் செயல்பாடுகளைக் கண்காணிக்கவும் ஒரு முறையான தேசியக் கொள்கையைத் தயாரிக்கத் தீர்மானிக்கப்பட்டுள்ளது. தற்போது இதற்காகப் பல்வேறு நிறுவனங்களால் வெவ்வேறு நடைமுறைகள் பின்பற்றப்படுகின்றன. இதனை ஒருங்கிணைத்து, வெளிப்படைத்தன்மையுடன் கூடிய தேசியக் கொள்கையொன்றை வகுப்பதற்காகத் தொழில் மற்றும் வெளிநாட்டு வேலைவாய்ப்பு அமைச்சின் கீழ் ஒரு செயற்குழுவை நியமிக்க அமைச்சரவை அனுமதி வழங்கியுள்ளது.
6. தேசிய அறிவுசார் சொத்துரிமைக் கொள்கையைத் தயாரித்தல்
– புத்தாக்கம் மற்றும் படைப்பாற்றலைப் பாதுகாக்கும் வகையில் சட்டங்களை நவீனமயமாக்க முடிவு.
2003 ஆம் ஆண்டின் 36 ஆம் இலக்க அறிவுசார் சொத்துரிமைச் சட்டத்தின் கீழ் தற்போதுள்ள கட்டமைப்பில் சில நடைமுறைச் சிக்கல்கள் காணப்படுகின்றன. சர்வதேசத் தரங்களுக்கு இணங்கவும், நாட்டின் புத்தாக்கங்களை உலக அளவில் பாதுகாக்கவும் ஒரு விரிவான ‘தேசிய அறிவுசார் சொத்துரிமைக் கொள்கை’ அவசியமாகிறது. இதற்கமைய, வர்த்தக, உணவுப் பாதுகாப்பு மற்றும் கூட்டுறவு அபிவிருத்தி அமைச்சினால் முன்வைக்கப்பட்ட புதிய கொள்கையைத் தயாரிப்பதற்கான யோசனைக்கு அமைச்சரவை அங்கீகாரம் வழங்கியுள்ளது.
7. இலங்கைக்கான தேசிய விண்வெளி கொள்கையை தயாரிக்க முடிவு
– அனர்த்த முகாமைத்துவம் மற்றும் தொடர்பாடல் துறைகளில் விண்வெளித் தொழில்நுட்பத்தைப் பயன்படுத்த நடவடிக்கை
விண்வெளித் தொழில்நுட்பத்தின் பயன்பாடு தற்போது நாட்டின் அபிவிருத்திக்கு மிக அவசியமான ஒன்றாக மாறியுள்ளது. பேரிடர் முகாமைத்துவம், தொடர்பாடல், பாதுகாப்பு மற்றும் சுற்றாடல் பாதுகாப்பு போன்ற துறைகளில் விண்வெளித் தொழில்நுட்பத்தின் நன்மைகளை முறையாகப் பெறுவதற்கு ஒரு தேசிய கொள்கை அவசியம் எனக் கண்டறியப்பட்டுள்ளது. இதற்காக விண்வெளித் துறை சார்ந்த நிபுணர்களை உள்ளடக்கிய குழுவொன்றை நியமித்து, சர்வதேச சட்டங்களுக்கு உட்பட்ட வகையில் தேசிய விண்வெளி கொள்கையைத் தயாரிக்க அமைச்சரவை அனுமதி அளித்துள்ளது.
8. 2026 முதல் 6 மாதங்களுக்கு நீர் கட்டணங்களில் மாற்றமில்லை!
– மக்களின் வாழ்க்கைச் செலவைக் கருத்திற்கொண்டு நீர் கட்டணங்களைத் திருத்தாதிருக்க அரசாங்கம் தீர்மானம்
தற்போதுள்ள நீர் கட்டணக் கொள்கையின்படி, செலவு மாற்றங்களைக் கருத்திற்கொண்டு அரையாண்டுக்கு ஒருமுறை கட்டணத் திருத்தம் மேற்கொள்ளப்பட வேண்டும். இருப்பினும், 2025 ஆம் ஆண்டுக்கான வரவு செலவுத் திட்டத்தின் மதிப்பீடுகளின்படி, தற்போதுள்ள கட்டணங்கள் மூலம் தேசிய நீர் வழங்கல் மற்றும் வடிகாலமைப்புச் சபையின் செயல்பாட்டுச் செலவுகளை ஈடுகட்ட முடியும் எனத் தெரியவந்துள்ளது. இதற்கமைய, 2026 ஆம் ஆண்டின் முதல் 06 மாதங்களுக்கு நீர் கட்டணங்களை அதிகரிக்காமல் அப்படியே பேணுவதற்கு அமைச்சரவை அங்கீகாரம் வழங்கியுள்ளது.
9. 2026 சிறுபோக விவசாயத்திற்கு 15,000 மெ.தொ. யூரியா கொள்வனவு
– விவசாயிகளுக்குத் தடையின்றி உரத்தை வழங்க ரூ. 10,200 நிலையான விலையில் விநியோகிக்க முடிவு
2026 சிறுபோக நெற்செய்கைக்காக சுமார் 450,000 – 500,000 ஹெக்டேயர் நிலப்பரப்பு பயிரிடப்படும் என எதிர்பார்க்கப்படுகிறது. இதற்காகச் சுமார் 75,000 மெட்ரிக் தொன் யூரியா உரம் தேவைப்படுகிறது. தற்போது கையிருப்பிலுள்ள உரத்திற்கு மேலதிகமாக, மேலும் 15,000 மெட்ரிக் தொன் யூரியா உரத்தை அரச நிறுவனங்கள் ஊடாகக் கொள்வனவு செய்யத் தீர்மானிக்கப்பட்டுள்ளது. இந்த உரம் விவசாயிகளுக்கு 50 கிலோ மூட்டை ஒன்று 10,200/- ரூபா என்ற சலுகை விலையில் விவசாய சேவை மையங்கள் ஊடாக விநியோகிக்கப்படும்.
10. நில்வளா கங்கை உப்புத் தடுப்பணையால் பாதிக்கப்பட்ட பயிர்களுக்கு ரூ. 1,200 மில்லியன் நஷ்டஈடு
– 2019 – 2022 வரை 7 போகங்களில் சேதமடைந்த விவசாய நிலங்களுக்கு நிதி
மாத்தறை மாவட்டத்தில் நில்வளா கங்கை குறுக்கே உப்புத் தடுப்பணை அமைக்கப்பட்டதால் ஏற்பட்ட வெள்ளப் பாதிப்புகள் காரணமாகப் பயிர்களை இழந்த விவசாயிகளுக்கு நஷ்டஈடு வழங்கத் தீர்மானிக்கப்பட்டுள்ளது. 2019 சிறுபோகம் முதல் 2022 சிறுபோகம் வரையிலான 7 போகங்களில் பாதிக்கப்பட்ட விவசாயிகளுக்காக மொத்தம் ரூபா 1,200 மில்லியன் ஒதுக்கப்பட்டுள்ளது. பாதிப்பின் அளவைப் பொறுத்து ஒரு ஏக்கருக்கு ரூபா 40,000 முதல் ரூபா 64,102 வரை நஷ்டஈடு வழங்கப்படவுள்ளது.
11. மாலபே – கடுவல வீதியை (B263) ரூ. 819 மில்லியன் செலவில் அபிவிருத்தி செய்ய ஒப்பந்தம்
– 5.56 கி.மீ. தூரப் பாதையைத் தரம் உயர்த்த உள்நாட்டு நிறுவனத்திற்கு அனுமதி
தேசிய அதிவேக நெடுஞ்சாலை வலையமைப்பை வலுப்படுத்தும் திட்டத்தின் கீழ், மாலபே – கடுவலை வீதியின் (B263) 5.56 கிலோமீட்டர் தூரப் பகுதியை அபிவிருத்தி செய்யத் தீர்மானிக்கப்பட்டுள்ளது. இதற்காகக் கோரப்பட்ட விலைமனுக்களின் அடிப்படையில், குறைந்த விலைமனுவைச் சமர்ப்பித்த M/s Senarath Engineering (Pvt) Ltd நிறுவனத்திற்கு ரூபா 819 மில்லியன் (வரி நீங்கலாக) மதிப்பீட்டில் இந்த ஒப்பந்தத்தை வழங்க அமைச்சரவை அங்கீகாரம் அளித்துள்ளது.
12. ஸ்ரீ லங்கன் எயார்லைன்ஸ் நிறுவன மைக்ரோசொப்ட் மென்பொருள் உரிமம் புதுப்பிப்பு
– 2 ஆண்டுகளுக்கு 1.816 மில்லியன் டொலர் செலவில் ஒப்பந்தம்
ஸ்ரீலங்கன் ஏர்லைன்ஸ் நிறுவனத்தின் செயல்பாடுகளுக்குத் தேவையான மைக்ரோசொப்ட் மென்பொருள் உரிமங்கள் மற்றும் கிளவுட் சேவைகளைப் பெறுவதற்காகப் புதிய ஒப்பந்தம் மேற்கொள்ளப்பட்டுள்ளது. இதற்கான போட்டி விலைமனு கோரல் ஊடாகத் தெரிவு செய்யப்பட்ட Crayon Software Lanka (Private) Limited நிறுவனத்திற்கு 02 ஆண்டுகால ஒப்பந்தத்தை 1.816 மில்லியன் அமெரிக்க டொலர் மதிப்பீட்டில் வழங்க அமைச்சரவை அனுமதி அளித்துள்ளது.
13. ரூ. 833 மில்லியன் நிதியில் 100 பாடசாலைகளை உள்ளடக்கி வீதிப் பாதுகாப்பு விழிப்புணர்வு
– ‘Take Care – சுரக்கமு மகதொட்ட’ செயற்திட்டம் 2028 வரை நீடிப்பு
பாடசாலை மாணவர்களிடையே வீதிப் பாதுகாப்பு மற்றும் ஒழுக்கத்தை மேம்படுத்தும் நோக்கில் செயல்படுத்தப்படும் “Take Care – சுரக்கெமு மகதொட்ட” செயற்திட்டத்தை 2026-2028 காலப்பகுதியிலும் தொடரத் தீர்மானிக்கப்பட்டுள்ளது. இதற்காக ‘கிளீன் ஸ்ரீ லங்கா’ திட்டத்தின் கீழ் 833 மில்லியன் ரூபா ஒதுக்கப்பட்டுள்ளது. இத்திட்டத்தின் கீழ் ஓராண்டிற்கு 100 பாடசாலைகள் வீதம் மாணவர்களுக்கான வீதிப் பாதுகாப்பு விழிப்புணர்வு நடவடிக்கைகள் முன்னெடுக்கப்படும்.
14. ‘Healthy Food – Happy Life’ தேசிய ஊடகத் திட்டத்திற்கு ரூ. 600 மில்லியன்
– சரியான போஷாக்கு மற்றும் தொற்றா நோய்களைத் தடுப்பது குறித்து மக்களிடையே விழிப்புணர்வு
மக்களிடையே ஆரோக்கியமான உணவுப் பழக்கங்களை ஊக்குவிக்கவும், போஷாக்கு குறைபாடு மற்றும் தொற்றா நோய்களைத் தடுக்கவும் “Healthy Food – Happy Life” எனும் தேசிய ஊடகப் பரப்புரையைத் தொடர அமைச்சரவை அனுமதி அளித்துள்ளது. 2026-2028 காலப்பகுதியில் செயல்படுத்தப்படவுள்ள இத்திட்டத்திற்காக 600 மில்லியன் ரூபா ஒதுக்கப்பட்டுள்ளதுடன், இலங்கை ரூபவாஹினி கூட்டுத்தாபனம் ஊடாக இச்செயற்திட்டம் முன்னெடுக்கப்படும்.
15. உள்நாட்டு உருளைக்கிழங்கு விவசாயிகளிடமிருந்து உருளைக்கிழங்கைக் கொள்வனவு செய்ய முடிவு
– விவசாயிகளைப் பாதுகாக்கும் நோக்கில் கூட்டுறவு மொத்த விற்பனை நிலையங்கள் ஊடாக நேரடி கொள்வனவு
உள்நாட்டு உருளைக்கிழங்கு விவசாயிகளுக்குச் சிறந்த விலையைப் பெற்றுக்கொடுக்கும் நோக்கில், நுவரெலியா மற்றும் பதுளை மாவட்டங்களில் அறுவடை செய்யப்படும் உருளைக்கிழங்கைக் கூட்டுறவு மொத்த விற்பனை நிலையங்கள் (CWE) ஊடாக நேரடியாகக் கொள்வனவு செய்யத் தீர்மானிக்கப்பட்டுள்ளது. ஒரு விவசாயியிடமிருந்து அதிகபட்சமாக 1,000 கிலோகிராம் உருளைக்கிழங்கு கொள்வனவு செய்யப்படும். இதன் மூலம் சந்தையில் உருளைக்கிழங்கு விலையில் ஏற்படும் வீழ்ச்சியைத் தடுத்து விவசாயிகளின் வாழ்வாதாரத்தைப் பாதுகாக்க எதிர்பார்க்கப்படுகிறது.
16. வனவிலங்கு பாதுகாப்புத் திணைக்களத்திற்காக 181 மோட்டார் சைக்கிள்கள் கொள்வனவு
– யானை முகாமைத்துவம் மற்றும் களப் பணிகளை வினைத்திறனாக்க ரூ. 91.26 மில்லியன் முதலீடு
காட்டு யானை மேலாண்மை மற்றும் ஏனைய வனவிலங்கு பாதுகாப்புப் பணிகளில் ஈடுபடும் அதிகாரிகளின் பயணத் தேவைகளுக்காகப் புதிய மோட்டார் சைக்கிள்களைக் கொள்வனவு செய்யத் தீர்மானிக்கப்பட்டுள்ளது. இதற்கான போட்டி விலைமனு கோரல் ஊடாகத் தெரிவு செய்யப்பட்ட David Pieris Motor Company நிறுவனத்திடமிருந்து 181 மோட்டார் சைக்கிள்களை 91.26 மில்லியன் ரூபா (வரி நீங்கலாக) செலவில் கொள்வனவு செய்ய அமைச்சரவை அங்கீகாரம் அளித்துள்ளது.
17. பதில் கடமையாற்றும் பணிப்பாளர் நாயகங்கள் அந்தந்த பதவிகளில் நிரந்தரம்
– நிர்வாகச் சேவையின் சிரேஷ்ட அதிகாரிகளுக்குப் பதவி உயர்வுடன் கூடிய நிரந்தர நியமனம்.
அரசாங்கத்தின் முக்கிய திணைக்களங்களில் பதில் கடமையாற்றி வரும் இரு சிரேஷ்ட அதிகாரிகளை அந்தந்தப் பதவிகளில் நிரந்தரமாக்கத் தீர்மானிக்கப்பட்டுள்ளது. இதன்படி, அரச நிதிமூலக் கொள்கைத் திணைக்களத்தின் பணிப்பாளர் நாயகமாகப் பதில் கடமையாற்றும் திரு. எம்.கே.சி.சேனநாயக்க மற்றும் அபிவிருத்தி நிதித் திணைக்களத்தின் பணிப்பாளர் நாயகமாகப் பதில் கடமையாற்றும் திரு. பி.எம்.கே.ஹெட்டியாராச்சி ஆகியோரை 2026 ஜனவரி 01 முதல் அமுலுக்கு வரும் வகையில் அந்தப் பதவிகளில் நிரந்தரமாக்க அமைச்சரவை அனுமதி வழங்கியுள்ளது.
18. இரத்தினபுரி மாவட்டத்திற்கான புதிய அரசாங்க அதிபராக எம்.பீ.லலித் ஆனந்த நியமனம்
– கேகாலை மாவட்டத்திற்கு மாற்றப்பட்ட அரசாங்க அதிபரின் இடத்திற்குப் புதிய அதிகாரி நியமிப்பு.
இரத்தினபுரி மாவட்ட அரசாங்க அதிபராகக் கடமையாற்றிய திரு. கே.பீ.எஸ்.நிஷாந்த கேகாலை மாவட்டத்திற்கு மாற்றப்பட்டதைத் தொடர்ந்து ஏற்பட்ட வெற்றிடத்திற்குப் புதிய நியமனம் வழங்கப்பட்டுள்ளது. இலங்கை நிர்வாக சேவையின் விசேட தர அதிகாரியான திரு. எம்.பீ.லலித் ஆனந்த உடனடியாக அமுலுக்கு வரும் வகையில் இரத்தினபுரி மாவட்ட அரசாங்க அதிபராக நியமிக்கப்பட அமைச்சரவை அங்கீகாரம் வழங்கியுள்ளது.
19. யுத்தத்தால் பாதிக்கப்பட்ட படையினருக்கான நிவாரண உதவிகள் மற்றும் அடையாளப்படுத்தல்
– மரணமடைந்த அல்லது அங்கவீனமடைந்த படையினருக்கான கொடுப்பனவுகளை முறைப்படுத்தத் தீர்மானம்.
யுத்த காலப்பகுதியில் உயிரிழந்த அல்லது அங்கவீனமடைந்த பொலிஸ் மற்றும் முப்படை வீரர்களை முறையாக அடையாளம் கண்டு, அவர்களுக்கு வழங்கப்பட வேண்டிய நிவாரணங்களை உறுதிப்படுத்துவதற்கான இறுதி அறிக்கை சமர்ப்பிக்கப்பட்டுள்ளது. இதற்கமைய, பாதிக்கப்பட்ட வீரர்களுக்கு எவ்விதப் பாகுபாடுமின்றி நிவாரணங்களை வழங்கவும், புதிய அடையாள அட்டைகளை விநியோகிப்பதற்கான ஒழுங்குவிதிகளைத் தயாரிக்கவும் ஜனாதிபதி அவர்கள் முன்வைத்த யோசனைக்கு அமைச்சரவை அனுமதி அளித்துள்ளது.
20. வாகன இறக்குமதியின் போது 50% மேலதிக வரி விதிப்பு
– நாட்டின் நிதி நிலைமையைக் கருத்திற்கொண்டு 3 மாத காலத்திற்கு விசேட வரி நடைமுறை.
சர்வதேச சந்தையில் நிலவும் அசாதாரண சூழல் காரணமாக வாகன இறக்குமதிச் செலவுகள் அதிகரித்துள்ளதைக் கருத்திற்கொண்டு, தற்காலிகமாக மேலதிக வரி விதிக்கத் தீர்மானிக்கப்பட்டுள்ளது. இதன்படி, 2026 மே 16 முதல் அமுலுக்கு வரும் வகையில், மோட்டார் வாகன இறக்குமதியின் போது அறவிடப்படும் சுங்க இறக்குமதி வரிக்கு மேலதிகமாக 50% மேலதிக வரி (Surcharge) விதிக்கப்பட்டுள்ளது. இது 03 மாத காலத்திற்கு மட்டுமே செல்லுபடியாகும் என்பதுடன், 2026 மே 15 ஆம் திகதிக்கு முன்னர் கடன் கடிதம் (LC) திறக்கப்பட்ட வாகனங்களுக்கு இது பொருந்தாது.
