உக்ரைன் மீதான படையெடுப்பைத் தொடர்வதற்காக, பாதுகாப்பு நிதிக்கு நன்கொடை அளிக்குமாறு ரஷ்யாவின் பெரும் செல்வந்தர்களை விளாடிமிர் புடின் கேட்டுக்கொண்டுள்ளார்.
பாதுகாப்பு நிதிக்குப் பங்களிக்க
பிப்ரவரி 2022-ல் தொடங்கிய இந்த மோதலை, உக்ரைனின் கிழக்கு டான்பாஸ் பிராந்தியத்தில் தனது கட்டுப்பாட்டில் இல்லாத எஞ்சிய பகுதிகளை ரஷ்யா கைப்பற்றும் வரை ஜனாதிபதி புடின் தொடர்வார் என்றே எதிர்பார்க்கப்படுகிறது.
இந்த நிலையில், வியாழக்கிழமை நடைபெற்ற பேச்சுவார்த்தைகளுக்குப் பிறகு, பாதுகாப்பு நிதிக்குப் பங்களிக்கத் தாங்கள் தயாராக இருப்பதாகக் குறைந்தது இரண்டு தொழிலதிபர்கள் புடினிடம் தெரிவித்துள்ளதாக தகவல் வெளியாகியுள்ளது.
அமெரிக்காவின் மத்தியஸ்தத்துடன் அண்மையில் நடைபெற்ற பேச்சுவார்த்தைகளின்போது, டான்பாஸ் பகுதியிலிருந்து ஒருதலைப்பட்சமாகப் பின்வாங்க உக்ரைன் மறுத்ததைத் தொடர்ந்து, புடின் தனது படையெடுப்பைத் தொடர்ந்து முன்னெடுத்து வருவதாகத் தெரிகிறது.
இதனிடையே, அமைதித் தீர்வு குறித்த பேச்சுவார்த்தையின் புதிய சுற்று தொடர்பாக, சூழல் சாதகமானவுடன் அமெரிக்காவுடன் ரஷ்யா தொடர்புகொள்ளும் என்று செய்தித் தொடர்பாளர் டிமித்ரி பெஸ்கோவ் தெரிவித்துள்ளார்.
அமைதிப் பேச்சுவார்த்தைகள் தொடரும் என்று குறிப்பிட்டுள்ள பெஸ்கோவ், பிராந்தியங்கள் உள்ளிட்ட முக்கிய விவகாரங்கள் இன்னும் தீர்க்கப்படாமல் உள்ளதாகவும் தெரிவித்துள்ளார்.
ரஷ்யாவின் பாதுகாப்புச் செலவினம் கடந்த ஆண்டில் 42 சதவீதம் அதிகரித்து, 13.1 டிரில்லியன் ரூபிள் (121 பில்லியன் பவுண்டுகள்) அளவை எட்டியுள்ளது.
More Read
600 பில்லியன் ரூபிள்களைத் திரட்ட
வரிவிதிப்பின் மூலம் தனது பொருளாதாரத்தை நிலைப்படுத்தவும் ரஷ்யா முயன்று வருகிறது. 2023-ஆம் ஆண்டில், சில பெரிய நிறுவனங்கள் மீது ஒருமுறை மட்டும் விதிக்கப்படும் 10 சதவீத கூடுதல் இலாப வரியின் மூலம் ரஷ்யா 320 பில்லியன் ரூபிள் நிதியைத் திரட்டியது.
மட்டுமின்றி, சிறு மற்றும் நடுத்தரத் தொழில்களிடமிருந்து மூன்று ஆண்டுகளில் கூடுதலாக 600 பில்லியன் ரூபிள்களைத் திரட்டும் முயற்சியாக, ஜனவரி மாதத்தில் ரஷ்யா மதிப்புக்கூட்டு வரியை 22 சதவீதமாக உயர்த்தியது.
இதனிடையே அமெரிக்கத் தடைகள் காரணமாக ரஷ்யா கணிசமான தள்ளுபடி விலையில் எண்ணெயை விற்க நேர்ந்ததால், ஜனவரி மற்றும் பிப்ரவரி மாதங்களுக்கான ரஷ்யாவின் பட்ஜெட் பற்றாக்குறை, ஓராண்டு முழுவதற்கும் கணிக்கப்பட்ட அளவின் 90 சதவீதத்திற்கும் மேலாகப் பெருகியுள்ளது.
