நேற்றையதினம் (20) இடம்பெற்ற இவ்வார அமைச்சரவைக் கூட்டத்தில் 14 முக்கிய தீர்மானங்கள் எட்டப்பட்டுள்ளன.
1. மாகாண மற்றும் உள்ளூராட்சி சபைகளின் கீழுள்ள 60 வீதிகளைத் தரம் உயர்த்த அரசாங்கம் தீர்மானம்
– வீதி அபிவிருத்தி அதிகாரசபைக்குச் சொந்தமில்லாத வீதிகளைப் புனரமைக்க நடவடிக்கை
இலங்கையின் பிரதான வீதிகள் மற்றும் அதிவேக நெடுஞ்சாலைகளின் பராமரிப்புப் பொறுப்பு வீதி அபிவிருத்தி அதிகாரசபையிடம் உள்ள போதிலும், ஏனைய அதிகாரிகளின்கீழ் உள்ள பல வீதிகள் அவசரமாகப் புனரமைக்கப்பட வேண்டிய நிலையில் உள்ளன.
இதற்கமைய, மாகாண சபைகள் அல்லது உள்ளூராட்சி அதிகாரசபைகளுக்குச் சொந்தமான, ஆனால் வீதி அபிவிருத்தி அதிகாரசபையினால் பொறுப்பேற்கப்பட்டு விரைவாக மேம்படுத்தப்பட வேண்டிய 60 வீதிகள் அடையாளங்காணப்பட்டுள்ளன.
இந்த வீதிகளைப் புனரமைப்பதற்கான நடைமுறைகள் மற்றும் பரிந்துரைகளை வழங்குவதற்காக நிதி அமைச்சு, போக்குவரத்து அமைச்சு மற்றும் மாகாணப் பிரதம செயலாளர்கள் உள்ளிட்ட பிரதிநிதிகள் அடங்கிய விசேட அதிகாரிக் குழுவொன்றை நியமிக்க அமைச்சரவை அங்கீகாரம் வழங்கியுள்ளது.
2. 3 இலட்சத்திற்கும் அதிக மீனவர் சுகாதாரம், பாதுகாப்பு உரிமைகளை உறுதிப்படுத்தும் தீர்மானம்
– சர்வதேச மீனவர் சேவை ஒப்பந்தத்தை ஏற்றுக் கொள்ள அமைச்சரவை முடிவு
சர்வதேச தொழிலாளர் அமைப்பின் (ILO) 96ஆவது மாநாட்டில் நிறைவேற்றப்பட்ட மீனவர் சேவை ஒப்பந்தத்தை (C188) அங்கீகரிக்க அமைச்சரவை தீர்மானித்துள்ளது.
சுமார் 315,000 இற்கும் அதிகமான மீனவர்களைக் கொண்டுள்ள இலங்கையின் மீன்பிடித் துறையில் நிலவும் தொழில் பாதுகாப்பு, சுகாதாரம் மற்றும் மருத்துவ வசதிகள் தொடர்பான சவால்களை எதிர்கொள்வதே இதன் நோக்கமாகும்.
இந்த ஒப்பந்தத்தின் மூலம் சர்வதேச ரீதியாக அங்கீகரிக்கப்பட்ட தரநிலைகளை இலங்கையின் மீன்பிடித் துறையில் அறிமுகப்படுத்தவும், அவற்றைப் படிப்படியாக அமுல்படுத்தத் தேவையான ஒழுங்குவிதிகளை உருவாக்கவும் அமைச்சரவை அனுமதி அளித்துள்ளது.
3. கண்டி எசல பெரஹரா தொடர்பான பாரம்பரிய அறிவு மற்றும் கலாசாரத்தைப் பாதுகாத்தல்
– உலக அறிவுசார் சொத்து அமைப்பின் (WIPO) உதவியுடன் உலகளாவிய ரீதியில் அங்கீகாரம் பெறத் திட்டம்.
கண்டி எசல பெரஹராவுடன் தொடர்புடைய பல நூற்றாண்டுகள் பழமையான பாரம்பரியக் கலை வடிவங்கள் மற்றும் கலாசார விழுமியங்களைப் பாதுகாக்கும் நோக்கில் புதிய செயற்திட்டமொன்று ஆரம்பிக்கப்படவுள்ளது. உலக அறிவுசார் சொத்து அமைப்பின் (WIPO) ‘அறிவுசார் சொத்துக்கள் மூலம் திருவிழாச் சுற்றுலாத்துறையை மேம்படுத்தல்’ எனும் கருத்திட்டத்தின் கீழ் இது முன்னெடுக்கப்படும். குறிப்பாக வெளியீட்டு உரிமைகள் மற்றும் வர்த்தகச் சின்னங்களைப் பாதுகாப்பதன் மூலம் இப்பாரம்பரிய விழுமியங்களின் பெறுமதியை அதிகரிக்கவும், இதற்காகத் தொடர்புடைய அனைத்துப் பங்காளர்களையும் உள்ளடக்கிய விசேட குழுவொன்றை நியமிக்கவும் அமைச்சரவை தீர்மானித்துள்ளது.
4. நீர் மற்றும் கழிவுநீர் முகாமைத்துவத்தை நவீனமயமாக்க அவுஸ்திரேலியாவுடன் ஒப்பந்தம்
– NWSDB மற்றும் மெல்பேர்ன் பல்கலை இணைந்து தொழில்நுட்பப் புத்தாக்கங்களை முன்னெடுக்க முடிவு
இலங்கையின் தேசிய நீர் வழங்கல் மற்றும் வடிகாலமைப்புச் சபையின் (NWSDB) தொழில்நுட்ப அறிவு மற்றும் ஆராய்ச்சித் திறன்களை மேம்படுத்த அவுஸ்திரேலியாவின் மெல்பேர்ன் தொழில்நுட்ப நிறுவனம் (RMIT) முன்வந்துள்ளது.
இதற்கமைய, நீர் மற்றும் கழிவுநீர் முகாமைத்துவத் துறைகளை நவீனமயமாக்கல் மற்றும் நீண்டகால நீர் பாதுகாப்பை உறுதிப்படுத்துவதற்கான புரிந்துணர்வு ஒப்பந்தத்தில் கையெழுத்திட அமைச்சரவை அங்கீகாரம் வழங்கியுள்ளது.
இதன் மூலம் இலங்கை அதிகாரிகளுக்கு சர்வதேச ரீதியிலான பயிற்சிகள் மற்றும் ஆராய்ச்சி வாய்ப்புகள் கிடைக்கப்பெறும்.
5. இலங்கை போக்குவரத்துச் சபைக்கு 600 புதிய சொகுசுப் பஸ்கள் கொள்வனவு
– ரூ. 14,400 மில்லியன் செலவில் தொலைதூரப் போக்குவரத்துச் சேவையை மேம்படுத்த அரசாங்கம் தீர்மானம்
2026 ஆம் ஆண்டின் வரவு செலவுத் திட்ட ஒதுக்கீட்டின் கீழ், இலங்கை போக்குவரத்துச் சபைக்கு 49-54 இருக்கைகளைக் கொண்ட 600 புதிய பஸ்களைக் கொள்வனவு செய்யத் தீர்மானிக்கப்பட்டுள்ளது.
முன்னதாகச் சாதாரண ரக பஸ்களைக் கொள்வனவு செய்யத் திட்டமிடப்பட்டிருந்த போதிலும், பயணிகளின் வசதி மற்றும் பாதுகாப்பைக் கருத்திற்கொண்டு Deluxe ரக (குளிரூட்டப்பட்ட) பஸ்களைக் கொள்வனவு செய்ய அமைச்சரவை தீர்மானித்துள்ளது.
இதற்காக ஒதுக்கப்பட்ட ரூ. 14,400 மில்லியன் நிதியைப் பயன்படுத்தி இந்த நவீன பஸ்களைச் சேவையில் ஈடுபடுத்த போக்குவரத்து அமைச்சுக்கு அனுமதி வழங்கப்பட்டுள்ளது.
6. இலங்கை துறைமுக அதிகாரசபைக்கு 2 நவீன இழுவைப் படகுகள்
– 17.16 மில். டொலர் செலவில் 5 வருட காலத்திற்கு துறைமுக சேவைகள் விரிவாக்கம்
துறைமுகச் செயல்பாடுகளை வினைத்திறனாக முன்னெடுக்க இரண்டு நவீன இழுவைப் படகுகளை (Tug Boats) 5 ஆண்டு காலத்திற்குத் தற்காலிகமாகக் குத்தகை அடிப்படையில் பெற்றுக்கொள்ளத் தீர்மானிக்கப்பட்டுள்ளது.
இதற்காகச் சர்வதேச போட்டி விலைமனு கோரல் ஊடாகத் தெரிவு செய்யப்பட்ட M/s Sri Lanka Shipping Company Limited நிறுவனத்திற்கு 17.16 மில்லியன் அமெரிக்க டொலர் பெறுமதியான ஒப்பந்தத்தை வழங்க அமைச்சரவை அங்கீகாரம் அளித்துள்ளது.
இந்தப் படகுகள் நவீன ‘Twin Azimuth stern Drive’ தொழில்நுட்பத்தைக் கொண்டவை என்பது குறிப்பிடத்தக்கது.
7. உயர் இரத்த அழுத்தம், நீரிழிவு முகாமைத்துவத் திட்ட காலப்பகுதி நீடிப்பு
– அமெரிக்க நிதியுதவியுடன் 2027 இறுதி வரை ஆரம்ப சிகிச்சைப் பணிகள் முன்னெடுக்கப்படும்
கொழும்பு, கம்பஹா, களுத்துறை, கண்டி, நுவரெலியா, மாத்தளை, காலி ஆகிய 7 மாவட்டங்களில் முன்னெடுக்கப்பட்டு வரும் உயர் இரத்த அழுத்தம் மற்றும் நீரிழிவு முகாமைத்துவம் தொடர்பான விசேட திட்டத்தை மேலும் தொடர அரசாங்கம் தீர்மானித்துள்ளது.
Resolve to Save Lives, Inc. எனும் நிறுவனத்தின் நிதியுதவியுடன் முன்னெடுக்கப்படும் இத்திட்டத்தின் கீழ் தற்போது 50,320 அமெரிக்க டொலர் நிதி எஞ்சியுள்ளது.
அந்த நிதியைப் பயன்படுத்தி இக்கருத்திட்டத்தின் காலப்பகுதியை 2027 டிசம்பர் 31 ஆம் திகதி வரை நீடிக்கச் சுகாதார அமைச்சுக்கு அமைச்சரவை அனுமதி வழங்கியுள்ளது.
8. ‘இலங்கை பட்டய கணனி நிறுவனம்’ புதிதாகத் தாபிக்கப்படவுள்ளது
– தகவல் தொழில்நுட்பத் துறையில் சர்வதேச அங்கீகாரம் பெற்ற தொழில்முறை அமைப்பை உருவாக்க முடிவு
இலங்கையின் தகவல் மற்றும் தொடர்பாடல் தொழில்நுட்பத் துறையிலுள்ள வல்லுநர்களைப் பிரதிநிதித்துவப்படுத்தும் வகையில், தற்போதுள்ள கணனிச் சங்கத்திற்குப் பதிலாக ‘இலங்கை பட்டய கணனி நிறுவனம்’ (Chartered Institute of Computing of Sri Lanka) எனும் அமைப்பைத் தாபிக்கத் தீர்மானிக்கப்பட்டுள்ளது.
ஏனைய தொழில்முறை நிறுவனங்களுக்குச் சமமான அந்தஸ்தைப் பெறும் வகையில் இந்த நிறுவனம் சட்டரீதியாக உருவாக்கப்படும். இதற்கான புதிய சட்டமூலத்தைத் தயாரிக்குமாறு சட்ட வரைஞருக்கு அறிவுறுத்த அமைச்சரவை தீர்மானித்துள்ளது.
9. வெளிநாட்டு வேலைவாய்ப்புப் பணியகச் சட்டத்தில் பாரிய மாற்றம்
– 1985 ஆம் ஆண்டின் பழைய சட்டத்தை நீக்கிப் புலம்பெயர் தொழிலாளர் நலன் காக்க புதிய சட்டம் அறிமுகம்
வெளிநாட்டு வேலைவாய்ப்புத் துறையில் ஏற்பட்டுள்ள தற்கால மாற்றங்கள் மற்றும் சர்வதேசத் தரநிலைகளுக்கு ஏற்ப, 1985 ஆம் ஆண்டின் 21 ஆம் இலக்க பழைய வெளிநாட்டு வேலைவாய்ப்புப் பணியகச் சட்டத்தை நீக்க அரசாங்கம் தீர்மானித்துள்ளது.
இதற்குப் பதிலாகப் புலம்பெயர் தொழிலாளர்களின் பாதுகாப்பு மற்றும் உரிமைகளை உறுதிப்படுத்தும் வகையிலான புதிய சட்டமூலமொன்றைத் தயாரிப்பதற்கு அமைச்சரவை கொள்கை ரீதியான அங்கீகாரத்தை வழங்கியுள்ளது.
இதன் மூலம் வெளிநாட்டு வேலைவாய்ப்புத் துறை மேலும் பலப்படுத்தப்படும்.
10. காணி உரித்து பதிவுச் சட்டத்தில் திருத்தம்
– காணி உரிமைப் பதிவில் நிலவும் சிக்கல்களைத் தீர்க்க 1998 ஆம் ஆண்டின் சட்டத்தில் மாற்றம்
இலங்கையில் காணித் துண்டுகளின் உரிமைகளைப் பதிவு செய்யும் ‘பிம்சவிய’ (Bimsaviya) திட்டத்தில் நிலவும் நடைமுறைச் சிக்கல்களைத் தீர்க்க அரசாங்கம் தீர்மானித்துள்ளது.
1998 ஆம் ஆண்டின் 21 ஆம் இலக்க காணி உரிமைப் பதிவுச் சட்டத்தின் கீழ் எதிர்பார்க்கப்பட்ட இலக்குகளை முழுமையாக அடைய முடியாத நிலையில், அனைத்துத் தரப்பினரின் ஆலோசனைகளுடன் புதிய திருத்தங்கள் அடையாளங்காணப்பட்டுள்ளன.
இதற்கமைய, நில அளவைத் திணைக்களத்தின் தரவுத் தொகுப்புடன் பதிவுகளை ஒருங்கிணைக்கும் வகையில் குறித்த சட்டத்தில் திருத்தங்களை மேற்கொள்ள அனுமதி அளிக்கப்பட்டுள்ளது.
11. சமூகப் பாதுகாப்புக் கிடைப்பனவுகளை பெறுவோரின் எண்ணிக்கையை அதிகரிக்க தீர்மானம்
– சுயதொழில் புரிவோரை உள்ளடக்கும் வகையில் 1996 ஆம் ஆண்டின் சட்டத்தில் திருத்தம்
மீன்பிடி மற்றும் விவசாயம் தவிர்ந்த ஏனைய சுயதொழில்களில் ஈடுபடுவோருக்கு ஓய்வூதியம் மற்றும் சமூகப் பாதுகாப்பு நன்மைகளை வழங்குவதற்காக 1996 இல் உருவாக்கப்பட்ட சமூகப் பாதுகாப்புச் சபைச் சட்டத்தைத் திருத்த அமைச்சரவை தீர்மானித்துள்ளது.
இச்சலுகைகளைப் பெற்றுக்கொள்ளும் இலக்குக் குழுக்களை விரிவுபடுத்துவதற்காக ஏற்கனவே வழங்கப்பட்ட அங்கீகாரத்தின் அடிப்படையில் தயாரிக்கப்பட்ட சட்டமூலத்தை இறுதி செய்யச் சட்ட வரைஞருக்கு அனுமதி வழங்கப்பட்டுள்ளது.
12. அபாயகரமான போதைப்பொருள் கடத்தலை தடுக்க சபையின் அதிகாரங்கள் விரிவாக்கம்
– தேசிய அபாயகரமான மருந்துகள் கட்டுப்பாட்டுச் சபையை நவீனப்படுத்த அரசாங்கம் முடிவு
நாட்டில் அதிகரித்து வரும் போதைப்பொருள் கடத்தல் மற்றும் பாவனையைக் கட்டுப்படுத்தும் நோக்கில், 1984 ஆம் ஆண்டின் 11 ஆம் இலக்க தேசிய அபாயகரமான மருந்துகள் கட்டுப்பாட்டுச் சபைச் சட்டத்தைத் திருத்தத் தீர்மானிக்கப்பட்டுள்ளது.
இச்சபையின் கடமைகள் மற்றும் அதிகாரங்களை விரிவுபடுத்துவதன் மூலம் போதைப்பொருள் ஒழிப்பு நடவடிக்கைகளை மேலும் வினைத்திறனாக முன்னெடுக்க எதிர்பார்க்கப்படுகிறது.
இதற்கான புதிய சட்டமூலத்தைத் தயாரிக்கும் பணிகளுக்கு அமைச்சரவை அங்கீகாரம் அளித்துள்ளது.
13. போதைப்பொருள் அடிமைகளுக்கான சிகிச்சை மற்றும் மறுவாழ்வுச் சட்டத்தில் திருத்தம்
– பாதிப்புக்குள்ளானோரை மீண்டும் சமூகத்துடன் இணைக்க முறையான பொறிமுறை உருவாக்கம்
போதைப்பொருட்களுக்கு அடிமையானவர்களுக்கு முறையான சிகிச்சை வழங்குதல், மறுவாழ்வு அளித்தல் மற்றும் அவர்களின் பாதுகாப்பை உறுதிப்படுத்தல் போன்ற நோக்கங்களுக்காக 2007 ஆம் ஆண்டின் 54 ஆம் இலக்க சட்டத்தில் திருத்தங்களை மேற்கொள்ளத் தீர்மானிக்கப்பட்டுள்ளது.
முதன்முறையாகப் போதைப்பொருள் பாவிப்பவர்களைக் கையாள்வதில் உள்ள சிக்கல்களைக் களைந்து, அவர்களை வெற்றிகரமாகச் சமூகமயப்படுத்துவதற்கான புதிய ஏற்பாடுகளை உள்ளடக்கி இச்சட்டமூலம் தயாரிக்கப்படும்.
14. நில அளவையாளர் நாயகம் பதவிக்குப் புதிய நியமனம்
– ஓகஸ்ட் 08 20 முதல் இலங்கையின் புதிய நில அளவையாளர் நாயகமாக திருமதி ஓ.டி.எம்.ஐ. திலகரத்ன
இலங்கை நில அளவைத் திணைக்களத்தின் நில அளவையாளர் நாயகமாகப் பணியாற்றும் திருமதி பி.கே.எல்.எஸ். பண்டுவதாவல எதிர்வரும் ஓகஸ்ட் 20 ஆம் திகதி ஓய்வு பெறவுள்ளார்.
வெற்றிடமாகவுள்ள இப்பதிவிக்கு, நில அளவைத் திணைக்களத்தின் மேலதிக நில அளவையாளர் நாயகமாகப் பணியாற்றும் சிரேஷ்ட அதிகாரியான திருமதி ஓ.டி.எம்.ஐ. திலகரத்னவை 2026.08.20 முதல் அமுலுக்கு வரும் வகையில் நியமிக்க அமைச்சரவை அங்கீகாரம் வழங்கியுள்ளது.
