ராஜஸ்தான் ராயல்ஸ் அணியை ரூ.15,281 கோடிக்கு கல் சொமானி தலைமையிலான கூட்டமைப்பு வாங்கியுள்ளது.
ரூ.15,281 கோடிக்கு வாங்கப்பட்ட ராஜஸ்தான் ராயல்ஸ்
வரும் மார்ச் 28 ஆம் திகதி 2026 ஐபிஎல் தொடர் தொடங்க உள்ளது. இதில், 2008 ஆம் ஆண்டு நடைபெற்ற முதல் ஐபிஎல் தொடரை மற்றும் வென்ற ராஜஸ்தான் ராயல்ஸ் அணி, அதன் பின்னர் சாம்பியன் பட்டம் வெல்லவில்லை.
ராஜஸ்தான் அணியின் 65% பங்குகளை மனோஜ் படாலேவும், 15% பங்குகளை ரெட்பேர்ட் கேபிட்டல்ஸ் நிறுவனமும்,13% பங்குகளை லாக்லான் முர்டோச்சும் வைத்திருந்தனர்.
ராஜஸ்தான் ராயல்ஸ் அணியை இவர்கள் விற்க முன்வந்த நிலையில், தற்போது அணியின் 100% பங்குகளை அமெரிக்க தொழிலதிபரான கல் சொமானி தலைமையிலான கூட்டமைப்பு 1.63 பில்லியன் டொலருக்கு (இந்திய மதிப்பில் ரூ.15,281 கோடி) வாங்கியுள்ளது.
இதன் மூலம், ஒரு பில்லியன் டாலருக்கும் அதிகமான தொகைக்கு விற்கப்படும் முதல் ஐபிஎல் அணி என்ற பெருமையை ராஜஸ்தான் ராயல்ஸ் பெற்றுள்ளது.
வால்மார்ட் குடும்பத்தை சேர்ந்த ராப் வால்டன் மற்றும் போர்டு நிறுவனத்தில் பங்குகளை வைத்துள்ள ஷீலா ஃபோர்டு ஹாம்ப் ஆகியோர் இதனை ஆதரிக்கின்றனர்.
2026 ஐபிஎல் தொடர் முடிவடைந்த பின்னர் இந்த புதிய உரிமையாளர்கள் பொறுப்பேற்பார்கள் என கூறப்படுகிறது.
2008 ஆம் ஆண்டு ஐபிஎல் தொடங்கப்பட்ட போது, மனோஜ் படாலே தலைமையிலான எமெர்ஜிங் மீடியா கூட்டமைப்பு 67 மில்லியன் டொலருக்கு ராஜஸ்தான் ராயல்ஸ் அணியை வாங்கியது. அப்போது வாங்கப்பட்ட அணிகளிலே இதுவே மலிவானது ஆகும்.
இதே போல் RCB அணியும் விற்பனையில் உள்ளது. சுமார் 3 தரப்பினர் RCB அணியை வாங்க போட்டியிடும் நிலையில், 2 பில்லியன் டொலர் வரை விற்கப்படும் என எதிர்பார்க்கப்படுகிறது.
யார் இந்த கல் சொமானி?
அமெரிக்காவை சேர்ந்த கல் சொமானி, இன்ட்ராஎட்ஜ் (IntraEdge), ட்ரூயோ (Truyo) போன்ற பல தொழில்நுட்பச் சேவை நிறுவனங்களின் நிறுவனராக உள்ளார்.
மேலும், மோட்டார் சிட்டி கோல்ஃப் கிளப்பின் இணை உரிமையாளராகவும், TGL கோல்ஃப் லீக் மற்றும் TMRW ஸ்போர்ட்ஸ் போன்ற நிறுவனங்களில் ஆரம்பகால முதலீட்டாளராகவும் அவர் உள்ளார்.
இதே போல், Denver Broncos என்ற NFL அணியை ராப் வால்டன், 2022 ஆம் ஆண்டில் 4.65 பில்லியன் டொலருக்கு வாங்கினார். ஷீலா ஃபோர்டு ஹாம்ப், Detroit Lions என்ற NFL அணியை வைத்துள்ளார்.
