– விவசாய ஏற்றுமதியை விரிவுபடுத்தும் முக்கிய மைல்கல்
இலங்கையிலிருந்து பாகிஸ்தான் சந்தைக்கு புதிய அன்னாசிப்பழங்களை ஏற்றுமதி செய்வதற்கான தொழில்நுட்ப மற்றும் தாவர சுகாதாரத் தேவைகளை (Phytosanitary) நிறைவு செய்வதன் மூலம், இரு நாடுகளுக்கும் இடையிலான விவசாய வர்த்தகத்தை வலுப்படுத்துவதில் இலங்கை ஒரு குறிப்பிடத்தக்க மைல்கல்லை எட்டியுள்ளது.
பல ஆண்டுகால தொழில்நுட்பக் கலந்துரையாடல்கள் மற்றும் ஒழுங்குமுறைப் பணிகள் வெற்றிகரமாக முடிவடைந்ததைத் தொடர்ந்து, புதிய அன்னாசிப்பழங்களை இறக்குமதி செய்வதற்கான தொடர்புடைய தாவர சுகாதார இறக்குமதி நிபந்தனைகளை இலங்கையும் பாகிஸ்தானும் இறுதி செய்துள்ளன. இது இலங்கை அன்னாசிப்பழங்கள் பாகிஸ்தான் சந்தையில் நுழைவதற்கு வழிவகுக்கிறது.
இந்தத் திட்டம், கராச்சியில் உள்ள இலங்கை துணைத் தூதரகத்தால், இலங்கை தேசிய தாவர தனிமைப்படுத்தல் சேவை, பாகிஸ்தானின் தேசிய தாவர பாதுகாப்பு அமைப்பு (NPPO), இலங்கை வர்த்தகத் திணைக்களம், இஸ்லாமாபாத்தில் உள்ள இலங்கை உயர் ஆணையம், வர்த்தகம், வணிகம், உணவுப் பாதுகாப்பு மற்றும் கூட்டுறவு அபிவிருத்தி அமைச்சு மற்றும் இலங்கை ஏற்றுமதி அபிவிருத்தி சபை (EDB) உள்ளிட்ட பல நிறுவனங்களுடன் நெருங்கிய ஒத்துழைப்புடன் செயல்படுத்தப்பட்டது.
சமீபத்தில் பாகிஸ்தானிய வர்த்தகக் குழுவினர் அந்நாட்டிற்கு வருகை தந்தபோது, வர்த்தகம், வணிகம், உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க, இலங்கை அன்னாசிப்பழங்கள், அவகாடோக்கள் மற்றும் ஆரஞ்சுப் பழங்கள் பாகிஸ்தான் சந்தையில் விரைவாகக் கிடைப்பதை உறுதி செய்யுமாறு சம்பந்தப்பட்ட நிறுவனங்களுக்கு அறிவுறுத்தினார். அன்னாசிப்பழங்களுக்கு முன்னுரிமை அளிக்கப்பட்டுள்ளது, மற்ற விவசாயப் பொருட்கள் குறித்த பேச்சுவார்த்தைகள் முன்னெடுக்கப்படும்.
சந்தை அணுகல் செயல்முறையின் ஒரு பகுதியாக, பாகிஸ்தான் தேசிய தாவரப் பாதுகாப்பு அமைப்பின் தொழில்நுட்ப அதிகாரி ஒருவர், 2026 ஆம் ஆண்டு ஜூலை மாதம் நாட்டில் உள்ள அன்னாசிப்பழம் விளையும் பகுதிகள் மற்றும் தாவரத் தனிமைப்படுத்தல் அமைப்புகளை ஆய்வு செய்தார். இந்த ஆய்வு வெற்றிகரமாக நிறைவடைந்த பின்னர், ஏற்றுமதியை எளிதாக்குவதற்கான தாவர சுகாதாரத் தேவைகள் இறுதி செய்யப்பட்டன.
பாகிஸ்தான் பழங்கள் மற்றும் காய்கறிகள் ஏற்றுமதியாளர்கள், இறக்குமதியாளர்கள் மற்றும் வர்த்தகர்கள் சங்கம் (PFVA) மற்றும் கொழும்பில் உள்ள பாகிஸ்தான் உயர் ஆணையகம் ஆகியவையும் இந்தச் செயல்முறைக்கு மதிப்புமிக்க ஆதரவை வழங்கின.
இதுகுறித்து கருத்து தெரிவித்த பாகிஸ்தான் பழங்கள் மற்றும் காய்கறிகள் ஏற்றுமதியாளர்கள், இறக்குமதியாளர்கள் மற்றும் வர்த்தகர்கள் சங்கத்தின் தலைவர் அஸ்லாம் பகாலி, இலங்கை தனது அன்னாசிப்பழங்களை பாகிஸ்தானுக்கு ஏற்றுமதி செய்வதற்கான சந்தை வாய்ப்பைப் பெற்றிருப்பதில் மகிழ்ச்சி தெரிவித்தார். மேலும், பாகிஸ்தானின் மக்கள் தொகை சுமார் 25 கோடி என்பதால், இது இலங்கை அன்னாசிப்பழ விவசாயிகளுக்கும் ஏற்றுமதியாளர்களுக்கும் பெரும் சாதகமாக அமையும் என்றும் அவர் குறிப்பிட்டார்.
உயர்தர வெப்பமண்டலப் பழங்களுக்கான தேவை காரணமாக, பாகிஸ்தான் இலங்கை அன்னாசிப்பழங்களுக்கான ஒரு சாத்தியமான சந்தையாகக் கருதப்படுகிறது. மேலும், அண்மையில் வர்த்தக ரீதியான ஏற்றுமதி தொடங்குவது இலங்கை விவசாயிகள், ஏற்றுமதியாளர்கள் மற்றும் வர்த்தகர்களுக்கு புதிய வாய்ப்புகளைத் திறக்கும் என்று எதிர்பார்க்கப்படுகிறது.
இந்தச் சாதனை, இரு நாடுகளுக்கும் இடையிலான விவசாய ஒத்துழைப்பு மற்றும் இருதரப்பு வர்த்தக உறவுகளை மேலும் வலுப்படுத்துவதில் ஒரு முக்கிய மைல்கல்லாகும். அத்துடன், இது இலங்கையின் விவசாய ஏற்றுமதி சந்தைகளைப் பன்முகப்படுத்துவதற்கும் பங்களிப்பை வழங்குவதற்காகவும். இந்த வாய்ப்பு கிடைத்துள்ளது.
