சூர்யா நடிப்பில் வெளியான ‘கறுப்பு’ திரைப்படத்தில், இசையமைப்பாளர் இளையராஜா மற்றும் அவரது பாடல்களுக்கான பதிப்புரிமை போராட்டத்தைக் கேலி செய்யும் விதமாக அமைந்திருந்த ஒரு வசனத்திற்காகப் படக்குழுவினர் மன்னிப்பு கேட்டுள்ளனர். மேலும், அந்த வசனம் திரையரங்குப் பிரதிகளிலிருந்து நீக்கப்படும் என்றும் உறுதியளித்துள்ளனர். ஆர்.ஜே. பாலாஜி இயக்கத்தில், சூர்யா நடிப்பில் வெளியாகி வெற்றிகரமாக ஓடிக்கொண்டிருக்கும் ‘கறுப்பு’ திரைப்படத்தில், 1985ஆம் ஆண்டு வெளியான ‘அலை ஓசை’ படத்தின் ‘போராடடா’ என்ற பாடல் இடம்பெறும் ஒரு காட்சி உள்ளது. அதைத் தொடர்ந்து வரும் ஒரு வசனம், இளையராஜா தனது பாடல்களுக்குப் பதிப்புரிமை கோரி நடத்தும் சட்டப் போராட்டங்களை நையாண்டி செய்யும் வகையில் அமைக்கப்பட்டிருந்தது.
இந்த வசனத்திற்கு சமூக வலைத்தளங்களில் இளையராஜாவின் ரசிகர்கள் மத்தியில் பலத்த எதிர்ப்பு கிளம்பியது.
தயாரிப்பு நிறுவனம் வெளியிட்டுள்ள அறிக்கையில், இளையராஜாவின் பெயரைப் பயன்படுத்தியது தற்செயலானது என்றும், கதையின் சூழலை விளக்குவதற்காக மட்டுமே அது வைக்கப்பட்டதே தவிர, 50 ஆண்டுகளுக்கும் மேலாக இசை உலகை ஆண்டு வரும் ‘இசை ராஜா’வின் புகழுக்குக் களங்கம் விளைவிக்கும் நோக்கம் தங்களுக்கு இல்லை என்றும் கூறியுள்ளனர்.
இந்த வசனத்தால் இளையராஜா, அவரது தரப்பினர் அல்லது அவரது ரசிகர்கள் யாரேனும் புண்பட்டிருந்தால் தங்களின் மனமார்ந்த வருத்தத்தைத் தெரிவித்துக் கொள்வதாகக் கூறியுள்ள படக்குழு, எதிர்காலப் பிரதிகளில் (தியேட்டர் மற்றும் ஓடிடி பதிப்புகளில்) இருந்து அந்த குறிப்பிட்ட வசனம் நீக்கப்படும் என்று அறிவித்துள்ளது.
