கூட்டு எதிர்க்கட்சிக்குள் தற்போதைக்கு எந்தவொரு ஜனாதிபதி வேட்பாளரோ அல்லது தெளிவான தலைமைத்துவமோ இல்லை என்பதை நவ ஜனதா பெரமுனவின் தலைவர் சுகீஸ்வர பண்டார பகிரங்கமாக ஒப்புக்கொண்டுள்ளார்.
கொழும்பு ஸ்ரீலங்கா சுதந்திர கட்சியின் தலைமையகத்தில் நேற்று (02) நடைபெற்ற கூட்டு எதிர்க்கட்சிகளின் ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் இதனைத் தெரிவித்தார்.
இச்சந்திப்பில் ஜனதா சேவக கட்சியின் தலைவர் ஜகத் விஜேசேகர மற்றும் லங்கா சமசமாஜ கட்சியின் கொழும்பு மாவட்ட தலைவர் பேஷல செனசிங்க ஆகியோரும் உடனிருந்தனர். கூட்டு எதிர்க்கட்சியின் சார்பில் கோட்டாபய ராஜபக்ஷவை அடுத்த தலைமைத்துவத்திற்கோ அல்லது ஜனாதிபதி வேட்பாளராகவோ கொண்டுவரும் எதிர்பார்ப்பு உள்ளதா என ஊடகவியலாளர்கள் எழுப்பிய கேள்விக்கு பதிலளித்த சுகீஸ்வர பண்டார, கூட்டு எதிர்க்கட்சிக்குள் தற்போதைக்கு ஜனாதிபதி வேட்பாளர் என்றோ அல்லது அத்தகையதொரு நிகழ்ச்சி நிரலோ எவரிடமும் இல்லை என்பதை உறுதிப்படுத்தினார். தற்போது முன்னாள் அமைச்சர் பேராசிரியர் ஜீ.எல். பீரிஸின் வழிகாட்டலின் கீழ் வெறும் 17 கட்சிகள் மட்டுமே ஒரு குழுவாக இணைந்து செயற்பட்டு வருவதாகக் குறிப்பிட்ட அவர், தங்களுக்குள் இன்னும் ஒரு முறையான தலைவரோ அல்லது வேட்பாளரோ தீர்மானிக்கப்படவில்லை என்பதை மறைமுகமாக வெளிப்படுத்தியுள்ளார்.
மேலும், எதிர்வரும் தேர்தல்களில் எந்தச் சின்னத்தில் போட்டியிடுவது, தங்களின் தலைவர் யார், மற்றும் தங்களின் அடுத்த ஜனாதிபதி வேட்பாளர் யார் என்பது குறித்து தற்போதைக்கு எந்தவொரு தெளிவான முடிவும் இல்லை என்றும், தேர்தல் நெருங்கும் போதே அது குறித்துப் பார்ப்போம் என்றும் அவர் குறிப்பிட்டார்.
