இந்தியா உட்பட 40 நாடுகளிலிருந்து கோழி மற்றும் முட்டை இறக்குமதிக்கு சவுதி அரேபியா தடை விதித்துள்ளது.
சவுதி அரேபியாவின் உணவு மற்றும் மருந்து ஆணையம் (SFDA), பொதுச் சுகாதாரத்தை பாதுகாக்கும் நோக்கில் 40 நாடுகளிலிருந்து கோழி மற்றும் முட்டை இறக்குமதியை முழுமையாகத் தடை செய்துள்ளது.
இதில் இந்தியா, ஜேர்மனி, சீனா, ஜப்பான், பிரித்தானியா உள்ளிட்ட பல நாடுகள் அடங்குகின்றன. மேலும் 16 நாடுகளின் சில மாகாணங்கள் மற்றும் நகரங்களில் இருந்து பகுதி தடை விதிக்கப்பட்டுள்ளது.
இந்த நடவடிக்கை, உலகளவில் பரவி வரும் பறவைக் காய்ச்சல் (Bird Flu) அச்சுறுத்தலின் காரணமாக எடுக்கப்பட்டதாக அதிகாரிகள் தெரிவித்துள்ளனர்.
SFDA, “இந்தத் தடை விதிக்கப்பட்ட நாடுகளின் பட்டியல் உலக சுகாதார நிலைமைகளைப் பொறுத்து காலம்தோறும் மறுபரிசீலனை செய்யப்படும்” என அறிவித்துள்ளது.
2004 முதல் சில நாடுகள் தொடர்ந்து தடை செய்யப்பட்ட நிலையில் உள்ளன. புதிய அபாய மதிப்பீடுகள் மற்றும் சர்வதேச அறிக்கைகளின் அடிப்படையில் பட்டியல் விரிவுபடுத்தப்பட்டு வருகிறது.
தடை பட்டியலில் உள்ள 40 நாடுகள்
இந்தியாவுடன் சேர்த்து, பிரித்தானியா, ஜேர்மனி, சீனா, ஆப்கானிஸ்தான், அஜர்பைஜான், இந்தோனேசியா, ஈரான், போஸ்னியா மற்றும் ஹெர்சகோவினா, பல்கேரியா, வங்காளதேசம், தைவான், ஜிபூட்டி, தென்னாப்பிரிக்கா, ஈராக், கானா, பாலஸ்தீனம், வியட்நாம், கம்போடியா, கஜகஸ்தான், கேமரூன், தென் கொரியா, வட கொரியா, லாவோஸ், லிபியா, மியான்மர், எகிப்து, மெக்சிகோ, மங்கோலியா, நேபாளம், நைஜர், நைஜீரியா, ஹாங்காங், ஜப்பான், புர்கினா பாசோ, சூடான், செர்பியா, ஸ்லோவேனியா, ஐவரி கோஸ்ட் மற்றும் மாண்டிநீக்ரோ ஆகியவை இதில் அடங்கும்.
More Read
பகுதி தடை விதிக்கப்பட்ட 16 நாடுகள்
அவுஸ்திரேலியா, அமெரிக்கா, இத்தாலி, பெல்ஜியம், பூட்டான், போலந்து, டோகோ, டென்மார்க், ருமேனியா, ஜிம்பாப்வே, பிரான்ஸ், பிலிப்பைன்ஸ், கனடா, மலேசியா, ஆஸ்திரியா மற்றும் காங்கோ ஜனநாயக குடியரசு உள்ளிட்ட 16 நாடுகளில் உள்ள சில மாகாணங்கள் மற்றும் நகரங்களுக்கு பகுதி தடை விதிக்கப்பட்டுள்ளது.
இந்தத் தடை, சவுதி அரேபியாவின் உள்ளூர் சந்தையில் உணவு பாதுகாப்பை வலுப்படுத்தும் முயற்சியாகக் கருதப்படுகிறது. ஆனால், வெப்ப சிகிச்சை (heat treatment) அல்லது பிற செயல்முறைகள் மூலம் நோய்க்கிருமிகளை அழித்த தயாரிப்புகள், சுகாதாரச் சான்றிதழுடன் வந்தால், அவை இறக்குமதி செய்ய அனுமதிக்கப்படும் எனவும் அதிகாரிகள் தெரிவித்துள்ளனர்.
இந்தியாவுடன் சேர்த்து ஆப்கானிஸ்தான், ஈரான், வியட்நாம், தென் கொரியா, வட கொரியா, லிபியா, மெக்சிகோ, நைஜீரியா, எகிப்து, தென்னாப்பிரிக்கா உள்ளிட்ட 40 நாடுகள் முழுமையாக தடை செய்யப்படநாடுகளின் பட்டியலில் உள்ளன.
