மத்திய கிழக்கில் நடைபெற்று வரும் இஸ்ரேல்-ஈரான் போர், இந்தியாவின் 2 பில்லியன் டொலர் மதிப்புள்ள ரத்தினம் மற்றும் நகை ஏற்றுமதிக்கு பெரும் பாதிப்பை ஏற்படுத்தும் என Gem and Jewellery Export Promotion Council (GJEPC) எச்சரித்துள்ளது.
இந்த 2 பில்லியன் டொலர் ஏற்றுமதியில் 800 மில்லியன் டொலர் மதிப்புள்ள பொருட்களை வேறு இடங்களுக்கு மாற்றலாம். ஆனால் 1.2 பில்லியன் டொலர் மதிப்புள்ள ஏற்றுமதியை மாற்ற முடியாது என GJEPC நிர்வாக இயக்குநர் சப்யசாசி ராய் தெரிவித்துள்ளார்.
இந்தியாவின் 2026 நிதியாண்டில் மொத்த நகை மற்றும் ரத்தின ஏற்றுமதி 29 பில்லியன் டொலர் ஆகும். இதில் அமெரிக்கா 9.24 பில்லியன் டொலர் மதிப்பில் மிகப்பெரிய சந்தையாக இருந்தது.
ஆனால் கடந்த ஆண்டு அமெரிக்கா விதித்த வரிகள் காரணமாக, ஐக்கிய அரபு அமீரகம் (UAE) இந்தியாவின் மிகப்பெரிய சந்தையாக மாறியது. தற்போது அமீரகத்திற்கு 8.33 பில்லியன் டொலர் மதிப்புள்ள நகைகள் ஏற்றுமதி செய்யப்பட்டுள்ளன.
“துபாய் பாதிக்கப்பட்டால், 8.3 பில்லியன் டொலர் மதிப்புள்ள ஏற்றுமதி நேரடியாக பாதிக்கப்படும். துபாய், மேற்கு ஆசியாவின் முக்கிய மையமாக செயல்படுகிறது. இந்தியாவில் தயாரிக்கப்படும் பெரும்பாலான தங்க நகைகள் முதலில் துபாய்க்கு அனுப்பப்படுகின்றன. அங்கிருந்து GCC நாடுகளுக்கு விநியோகிக்கப்படுகின்றன” என ராய் விளக்கினார்.
மேலும், வைர மற்றும் நகை வர்த்தகம் பெரும்பாலும் விமானப் போக்குவரத்திலேயே நடைபெறுகிறது. ஆனால் போர் காரணமாக விமான நிலையங்கள் மூடப்படுதல் மற்றும் வான்வழி தடைகள் அதிகரித்துள்ளதால், இந்திய நகைத் துறைக்கு பெரும் சவாலாக உள்ளது.
இந்தியாவின் நகை ஏற்றுமதி துறை, உலகளாவிய சந்தையில் முக்கிய பங்கு வகிக்கிறது. இஸ்ரேல்-ஈரான் போர் நீடித்தால், இந்தியாவின் நகைத் துறைக்கு பெரும் நிதி இழப்பு ஏற்படும் அபாயம் உள்ளது.
More Read
